OP HIERDIE BLAD

• MUURPROPPE

• CADAC GASBOTTELS UIT SA WERK NIE HIER NIE

• VERSEKERING

• BEHEER BY LUGHAWENS

• GIFTIGE GOED WAT BYT

• BIER EN WYN IN NZ

• KIWI WOORDE, UITDRUKKINGS en UITSPRAKE WAARAAN ONS NIE GEWOOND WAS NIE

• TV-KANALE

• DIE VERSKILLE TUSSEN NZ EN SA IN IMMIGRANTE SE EIE VERHALE

VERSKILLE TUSSEN NZ EN SUID-AFRIKA IN "N NEUTEDOP

As die verskille tussen SA en NZ in 'n paar sinne opgesom wil hê lees HIER asseblief.

MUURPROPPE
 

SA elektriese muurproppe pas nie hier in NZ nie. Om presies te weet watter proppe om te koop het ek 'n blad gemaak met 'n paar foto's en afmetings, sodat jy presies kan weet watter prop of verbindingstuk (adapter) om te koop. KLIEK HIER om na die blad met die foto's van die muurproppe te gaan. Die blad maak in 'n nuwe venster oop.

CADAC GASBOTTELS UIT SA

Ons sit almal nog met ons ou CADAC gasbottels uit SA, want jy kan hom nie hier laat volmaak nie. Eerstens verskil die koppeling en tweedens mag gashervulplekke (gewoonlik sommer die petrolstasie) slegs bottels hervul wat in NZ gedruktoets is. Elke gasbottel kry ook 'n plakker op waar elke hervulling aangeteken word en die bottels se reeksnommer word geregistreer. Gasbottels mag net vir 'n sekere aantal hervullings gebruik word voordat dit as onveilig beskou word. Los maar die CADAC gasbottel in SA en kom koop hier 'n nuwe een. Probleem opgelos!!

NS: 'n Splinternuwe 9Kg gasbottel kos in NZ ongeveer $50.

KINDERS

• Kinders gaan 13 jaar lank skool en begin in die jaar waarin hulle 5 jaar oud word.

• Kinders onder 14 jaar oud mag NIE alleen by die huis gelaat word nie.

• Dogters kan op enige ouderdom 'n aborsie kry SONDER die ouers se toestemming!

• Kinders kan op 15 jaar 'n leerlingbestuurderslisensie kry.

• Kinders is verplig om tot 16 jaar skool te gaan.

• Kinders kan vanaf 14 jaar wettig drank gebruik as hulle ouers die drank aan hulle verskaf.

• Kinders kan eers op 18 jaar self drank en sigarette koop.

• Kinders raak op 18 jaar stemgeregtig.

• Kinders onder 14 jaar mag nie vuurwerke koop nie.

• Kinders word op 20 volwassenes.

• Kinders kan op enige ouderdom 'n Lotto-kaartjie koop, maar moet oor 16 jaar wees om 'n krapkaartjie te koop!

VERSEKERING

In vergelyking met SA is versekering werklik goedkoop. 'n Voertuig met 'n waarde van minder as NZ $25 000 en huisinhoud van NZ $40 000 kan as 'n pakket verseker word vir NZ $60 per maand. Lewensversekering van NZ $300 000 sal jou ongeveer NZ $50 per maand kos as jy tussen 40 en 43 jr oud is.

'n Man wat jou vinnig op hoogte kan bring met al jou versekeringsopsies in NZ is Fritz Swart (ja, hy praat Afrikaans). Besoek gerus sy webwerf ( www.fritzswart.co.nz ) vir meer inligting.

TREK JOU SKOENE UIT!

SAners wie die eerste keer in NZ kom vind dit snaaks, irriterend en soms vernederend dat hulle, hulle skoene moet uittrek voordat hulle 'n huis binnegaan. By sommige SAners se huise dring hulle selfs daarop aan dat jy jou skoene aanhou uit vrees dat hulle aanstoot sal gee. Ek het 'n storietjie geskryf oor sulke SAners. Lees die storie HIER.

Die gebruik om jou skoene uit trek voordat jy 'n huis binnegaan is so prakties en "common sense" dat ons aldag vergeet om dit aan ander SAners te verduidelik.

Eerstens kan dit soms vir lang tye aaneen reën en as almal met hulle nat modder skoene op jou matte loop raak dit later sopnat en word nie gou weer droog nie en kan die matte begin vrot. Ons is almal bekend met die benoude reuk van 'n ou huis met nat matte!!. Tweedens is daar nie bediendes wat jou matte elke dag kan skoonmaak nie, jy moet dit self doen!

By baie huise sal jy 'n notabordjie by die voordeur sien wat jou versoek om jou skoene uit te trek, so trek maar jou skoene uit voordat jy 'n huis in NZ binnegaan - die groot klomp skoene wat voor die deur staan beteken nie ons is almal Mohammdane nie, ons trek net almal ons skoen uit.

BEHEER BY LUGHAWENS

As gevolg van die feit dat die ekonomie van NZ op landbou aangewese is, is biologiese beheermaatreëls UITERS streng.

Moet onder GEEN omstandighede enige plantaardige of dierlike produkte die land probeer binnebring nie (veral nie biltong nie!). Selfs modder onder jou skoene of 'n half-gëete toebroodjie kan jou in ernstige moeilikheid bring.

Verklaar enige produk of plant of ENIGIETS waaroor jy twyfel, as jy dit verklaar kan hulle dit net afneem en vernietig en spring jy die boete of selfs arrestasie vry. As hulle jou vang (en hulle gáán, want die honde snuffel aan almal en al die bagasie wat inkom) sal jy gearresteer word en as jy baie gelukkig is sal jy 'n NZ $200 (ongeveer R850) boete op die plek kry.

Die doane amptenare van NZ word beskryf as "The customs officials from hell" en sal enige verskoning soek om jou te beboet (ons praat van persoonlike ervaring! Lees ook die artikel in "Koerantberigte"). Dit is NIE die moeite werd NIE en ons ondersteun die Kiwi's in hierdie verband, want dit kan hulle ekonomie vernietig.

Ons maak baie lekker biltong in Kiwiland en NZ $200 kan baie biltong koop, sonder tronkstraf!! Die jongste slagoffer van hierdie streng beleid is die popgroep Franz Ferdinand wat 'n $200 boete gekry het vir 'n enkele lemoen in hulle bagasie (4 Augustus 2004).

GIFTIGE GOED WAT BYT

Miskien moet ek net iets sê van giftige goed in NZ. New Zealand het geen slange of skerpioene nie en net een inheemse giftige spinnekop (Katipo) wat baie skaars is en in baie jare nog niemand se dood veroorsaak het nie. Teengif teen hierdie spinnekop se byt is egter geredelik beskikbaar by hospitale .

Die enigste ander giftige spinnekop is 'n indringer van Australië genaamd die "White-tailed Spider" (op foto links) en hierdie pes is redelik algemeen. Die spinnekop se byt is nie dodelik nie, maar pynlik en gaan gepaard met 'n swelsel en erge irritasie.

Ontsteking van die byte veroorsaak die grootste probleme. Ek was so gelukkig om gedurende Desember 2004 sewe byte van die bliksem op my voorkop te kry in een aand. Aanvanklik was dit nie pynlik nie en het dit net soos ontsteekte muskietbyte gelyk, maar binne 'n paar uur was die byte erg geswel en baie pynlik met blasies op die bytplekke.

Ek was verplig om my dokter te besoek nadat die bytplekke ontsteek het en antibiotika en kortisoonsalf het redelik gou verligting gebring. Die bytplekke het ongeveer vir twee weke geswel gebly en dit het VERSKRIKLIK gejeuk.

Na 'n week het daar rofies gekom in die plek van die blasies en het daar gaatjies in my vel ingeval waar die spinnekop my gebyt het (sien foto). Dit het die bytplekke ongeveer 'n maand geneem om te genees. Ek was seker maar net een van die ongelukkiges, want eintlik is ons nie baie bekommerd oor gifgoed nie.

BIER EN WYN IN NZ
 

KIWI WOORDE, UITDRUKKINGS en UITSPRAKE WAARAAN ONS NIE GEWOOND WAS NIE

Die Kiwi's gebruik soms 'n soort Ingels waaraan 'n mens (ek) gewoond moes raak of leer ken en die onderstaande is 'n paar van hulle:

BROLLIE = Sambreel

SUNNY's = Donkerbrille

BACH (uitgespreek "Batch") = Strandhuis (Kom van "Bachelor pad" af).

CRIB = Strandhuis (meer gebruik in Suid-Eiland)

CHEERS = Dankie

BARRACOUTA = Soort van 'n baie lekker melkbrood - sag en hoog gerys.

TO SHOUT = Om vir almal drank of kos te koop.

HAVE A FEED = Om te gaan eet.

CHIPPIE = Skrynwerker

JAFA = Woord wat in die platteland gebruik word om iemand wat in Auckland bly te beskryf (Staan vir Just Another F......n/Fabulous? Aucklander!).

BOMBPROOF = Veral op platteland gebruik om 'n perd te beskryf wat nie gou skrik nie en baie mak is.

SMOKO = 'n Rookbreuk.

BRO = Broer of maat.

BUSH = Word voor woorde gebruik om iets / iemand te beskryf wat grof/onprofessioneel of onopgelei is soos "Bush Lawayer" of "Bush Mechanic".

TOGGS = Swemklere

YOUS FELLAS = Julle

SHE'LL BE RIGHT of SWEET AS = Alles sal reg wees

GOOD AS GOLD = Baie reg

ôi! = Roep as hulle nie jou naam ken nie of as jy in die AAAAA is.

TEA = Aandete

MORNING TEA = Brunch

JANDALS =  Plakkies

GêRRIETS = Uitspraak van "Garage"

WESTIE = Iemand wat uit Wes-Auckland kom. Gewoonlik so 'n "Boy Van Die Suburbs" soort van ou.

CRASH = Oorslaap - gewoonlik ongenooid! (Kan ook 'n motorongeluk wees!).

RUBBERNECK = Nuuskierige mense wie omkyk vir ongelukke terwyl hulle verby ry en baie keer self 'n ongeluk veroorsaak deur in die kar voor hom was te ry.

HE's A BIT OF A BLOUSE = Hy is ietwat van 'n sussie.

A "SLAPPER" = 'n Goedkoop meisie met twyfelagtige sedes.

SKIVVY = 'n Polo-nek T-hemp.

ANKLE BITER = 'n Kleuter
BARBIE = braai
BEEHIVE = Die Parlementsgebou in Wellington
CHILLY BIN = Cooler box
A "Japie" = 'n SAner (Van "Plaasjapie" af)
UTE = 'n Bakkie
PAKEHA = 'n Maori-woord vir 'n Wit persoon of iemand van Britse afkoms
DECK = 'n Stoep
TOGS = Swemklere / Sportklere
MOBILE = Selfoon
TEXT = SMS
 

Sal die lys aanvul soos die woorde my byval, my kop is soos 'n sif - bo in onder uit en net hier en daar sit 'n druppel!

TV-KANALE

New Zealand het 6 publieke TV-kanale, m.a.w kanale wat jy met jou gewone TV kan kyk sonder om te betaal. Daar is niks besonders aan die TV-kanale nie en die kwaliteit van programme is nou nie iets waaroor enigeen opgewonde sal raak nie. Programme word ook tot vervelens toe herhaal en ek wonder of daar nog 'n land in die wêreld is waar TV-programme so oor-en oor gewys word?

Getrou aan die Kiwi's se natuur sal ook omtrent ENIGIETS (ek is ernstig) die nuus haal en van die onbenulligste dingetjies kan 'n nuusberig van etlike minute raak (en besprekingsprogramme van etlike ure). 'n Mens moet dit self sien om dit te waardeer, dis ongelooflik.

As jy enigiets ordentlik wil sien moet jy maar vir jou 'n skottel met betaal-TV kry en dit word in NZ verskaf deur SKY TV teen baie billike tariewe wat begin by $46.00 per maand.

Daar is onlangs aangekondig dat die gratis TV-kanale iewers in 2007 met 18 vermeerder gaan word sodra Digitale TV in NZ bekend gestel word, maar dit moet nog realiseer en soos ek die span ken is dit eerder nader aan 2010 wat dit seker gaan gebeur. Ons sal maar sien - dalk verbaas hulle my. Ek hoop van harte so. Hulle het my toe verbaas en jy kan nou (25 Mei 2007) by elektroniese en meubelwinkels jou "Freeview decoder" (http://freeviewnz.tv/) koop teen ongeveer NZ $300 om die ekstra kanale te sien.

Lees 'n meer volledige en eerlike siening van NZ se TV-kanale op die webwerf Stuff U can Use.

IMMIGRANTE SE EIE STORIES OOR HULLE ERVARINGS IN NZ EN DIE VERSKILLE

• Eerste aankoms in NZ

• Aanpassing in NZ en die verskille tussen SA en NZ

MAORI's

KLIEK HIER om te kyk en te luister na 'n Maori-lied wat dit tot Nr.1 in NZ gemaak het. So lekker 1980's met "break dancing" en al. Baie oulik!!

^^ TERUG NA BO