My naam is Louwrens van der Merwe en ek woon in ‘n dorpie met die naam Cambridge  in die Waikato -streek op die Noord-Eiland van New Zealand. Cambridge staan bekend as "The Town of Trees" en het so 'n Stellenboschse atmosfeer. Cambridge is 145Km Suid van Auckland en 24Km Suid van Hamilton op die SH1 (State Highway 1).

Ons woon al meer as 8 jaar in New Zealand en het ‘n jaar in Auckland gewoon voordat ons na Cambridge getrek het. Ek is nie regtig 'n boer nie, ek werk in die IT-bedryf.
 

Ek ontvang maandeliks ongeveer 300 e-mails en weet redelik hoe immigrante voel en dink.

Sommer met die wegspring wil ek sê dat die menings wat ek in hierdie webwerf uitspreek NET MY EIE, en BAIE subjektiewe, menings en ervarings is.

WAARSKUWING:
 

Maak nou nie saak van watter kant af jy hierdie webwerf benader nie, wees verseker op een of ander stadium gaan van my menings of taalgebruik jou afpis, so wees sterk, wees groot, eet jou groente en maak vas jou veiligheidsgordel!

As jy een van daai mense is wat na 'n dosis realiteit of sterk woorde berading moet ontvang, pille moet drink of deur jou meerderwaardigheid oorval word MOENIE hierdie webwerf binnegaan NIE, want jy gaan skoon onderklere nodig hê kort voor lank!

New Zealand is 'n fantastiese land en seker so na aan 'n paradys as wat jy op aarde kan kom. Ek sal enige persoon aanraai om dit as 'n immigrasiebestemming te oorweeg, MAAR maak net 'n goed ingeligte besluit, want dit help niks jy kom sit hier in die paradys en krepeer van ellende nie.

 
Op hierdie webwerf kyk ek realisties, krities en met baie humor na lewe in NZ. Gun my my mening en vryheid van spraak soos ek jou jou anonimiteit gun. Omdat ek nie alles wat die Kiwi's, Kiwiland en SA immigrante aan my opdis vir soetkoek opvreet nie, beteken nie ek het nie gelukkig aangepas nie!

Welkom by my webwerf en kom ons kuier LEKKER!!

KLIEK HIER vir 'n paar interessante feite oor hierdie webwerf. 
 

IS MY WAARSKUWINGS NODIG? Lees verder....