OP HIERDIE BLAD:

• SUID-AFRIKANERS IN NZ

• VRYWILLIGE DIENS

• HUWELIKKE & IMMIGRASIE

• TAAL EN KULTUUR

• INTERESSANTE REALITEITE VAN IMMIGRASIE

• MAAK 'N GOED INGELIGTE BESLUIT

• BOEREWORSRESEP

SUID-AFRIKANERS IN NZ

Ek vind dit baie interessant dat besoekers aan my webwerf net soveel belangstel in die Suid-Afrikaners in NZ as in NZ self. 'n Vraag wat gereeld opduik is: "Hoe is die Suid-Afrikaners daar in NZ en wat maak hulle"?.

Om hierdie eenvoudige ou vragie te beantwoord kan jou maklik in 'n mynveld laat instap en oor die laaste paar jaar het ek al hierdie blad se inhoud verskeie kere verander omdat ek daarvan beskuldig word dat ek onregverdig, krities, sinies, bevooroordeeld, en nog ‘n hele spul ander goeters ook teenoor SAners in NZ is.

Ek word ook daarvan beskuldig dat ek growwe ongefundeerde veralgemenings maak oor my seining van SAners en ek pleit skuldig! ‘n Mens se gevoelens oor ander mense hang meeste van die tyd maar af van hoe hulle jou laat VOEL en hoe hulle jou BEHANDEL en is ‘n uiters subjektiewe ding wat moeilik deur ‘n stel feite verklaar kan word, ek WEET egter wanneer iemand my goed of sleg laat voel en dis vir my genoeg!

Al hierdie beskuldigings mag wel so wees, maar ek gee maar net MY sienig weer en die ervarings wat EK met ander SAners (veral Afrikaners) in NZ gehad het.  Ander SAners in NZ se ervaring van ons landgenote mag anders wees (en SAL ook anders wees).

Hieronder probeer ek MY EIE (niemand anders s’n nie) ervarings oor SAners stapsgewys weergee:

1. Om te begin wil ek eers sê dat SAners ‘n GEWELDIGE bydrae maak op alle vlakke van die samelewing in NZ en oor die algemeen as baie goeie, hardwerkende en eerlike werknemers gesien word. Die verskil wat SAners in NZ maak kan jy orals al duidelik begin sien, want hulle is ORALS verteenwoordig. Oor die algemeen presteer SAners uitstekend op professionele en akademiese gebied en is hulle ambisieus, dinamies, vooruitstrewend en kompeterend (iets wat die Kiwi’s nie altyd verstaan nie).  

2. SAners is geneig om in die groter sentra te verstig (om verskeie goeie redes, waarvan ekonomiese redes waarskynlik die grootste is).  Hulle vestig graag op plekke soos Auckland (vernaamste bestemming), Hamilton en omstreke, Tauranga, Rotorua, New Plymouth, Palmerston North, Wellington, Napier/Hastings en omstreke, Wellington, Christchurch (gewildste Suid-Eiland bestemming) en Dunedin. Jy sal SAners vandag feitlik op elke dorpie en gebied in NZ kry, maar die bostaande is maar net die vernaamste plekke waar hulle graag bly.

Groot getalle SAners werk ook op honderde (indien nie duisende) melkplase in die Waikato, Taranaki en Canterbury streke en hulle vaar uitstekend en verower elke jaar dosyne trofees vir produksie en maak hulle merk.

Toenemend begin SAners ook vestig in die akkerbou en wynbou gebiede van NZ en kan jy reeds groot getalle SAners vind in die “Bay of Plenty”, “Hawkes Bay” en Neslon/Marlborough streke. Die afgelope jaar of twee het die Nelson/Blenheim omgewing baie gewild begin raak onder SAners.

3.  Hoewel NZ grootliks 'n klaslose gemeenskap is handhaaf SAners steeds hulle "klasse" en sal hoofsaaklik net met SAners assosieer wie hulle beskou as op die dieselfde sosiale en inkomste "vlak" as hulle. Daar is enkele uitsonderings, maar hulle is skaars.

Wees ook maar voorbereid daarop dat daar orals waar daar baie SAners bymekaar is die gewone ou "KLIEKS" vorm wat om mekaar saamdrom soos brommers om 'n dr...l en waarin jy nie maklik toegelaat sal word nie! Hierdie stelling het al so baie lesers hulle speelgoed uit die kot laat gooi, maar hoe meer hulle daaroor kla hoe meer kry ek ‘n gevoel dis ‘n geval van “Methinks the lady doth protest too much"!  

4.  SAners het nog altyd daarvan gehou om mekaar te beïndruk met hulle besittings en hulle belangrikheid/geleerdheid en dit is asof dit die afgelope paar jaar net erger geword het. Na die “housing boom” in SA het SAners hulle huise/besighede/plase teen ongelooflike pryse verkoop en met GROOT bedrae geld hier in NZ aangekom en materialisme onder SAners is baie erg en dit is amper asof dit die maatstaf geword het waaraan hulle alles en almal meet.

SAners se beheptheid met karre en huise en die waarde wat hulle daaraan heg grens soms aan die absurde. Dis asof ‘n kar (veral 4x4’s en duur sportmotors) vir hulle al hulle verlore aansien moet herwin en nuwe respek moet verdien met die eerste oogopslag. Vir baie SAners is hulle met niks tevrede wat nie minstens ‘n spaarwiel op die agterdeur het nie. Sportmotors en luukse motors staan nie vêr agter die 4x4’s nie en as jy nie minstens ‘n paar “quad bikes” en ‘n Jetski/boot (of twee) in die garage het nie het jy dit nog nie gemaak nie!!

5.  Omdat ek seker noual reeds te veel gesê het wil ek volstaan met die volgende en ek dink dit sê BAIE: Dit maak nie saak waar in die wêreld jy Suid-Afrikaners bymekaar gooi nie, maar as jy vier Suid-Afrikaners op 'n plek het gaan hulle binne 'n maand vyf verskillende kerke en ses verskillende politieke partye gestig het!!

 VRYWILLIGE DIENS

Een van die vinnigste maniere om by die gemeenskap in te skakel en vriende te maak is om by een van die dosyne vrywilliger organisasies aan te sluit soos die brandweer, lewensredders, Sallies (Salvation Army), meals on wheels, ens. Ek het by die plaaslike Citizens Advice Bureau ingeskakel en gee gratis rekenaaropleiding aan bejaardes en help hulle met hulle rekenaarprobleme. Ek geniet dit baie en het op die manier al dosyne interessante mense ontmoet en vriende gemaak.

HUWELIKKE & IMMIGRASIE  

Ek wil sommer met die deur in die huis val deur te sê , as jy getroud is, werk aan jou huwelik VOORDAT jy aan jou immigrasie begin werk. Huweliksmaats is tot die uiterste op mekaar aangewese vir ondersteuning en hulp die eerste paar maande na immigrasie en swaarkry is noodwendig deel van die pakket. Immigrasie kan 'n GROOT toets vir 'n huwelik wees en ongelukkig deurstaan vele huwelikke nie die toets nie en verbrokkel die huwelik hier in die vreemde met baie hartseer gevolge.

'n Huwelik wat hier in die vreemde verbrokkel se gevolge word 'n duisend keer meer gevoel as wat die geval in SA tussen jou eie mense sou wees. Daardeur wil ek nie sê dat die verbrokkeling van 'n huwelik in SA nie ook traumaties is nie, nooit nie, die gevolge word hier net met soveel meer faktore vermenigvuldig. Jy sit hier in die vreemde met geen, of 'n baie klein, ondersteuningstelsel om jou by te staan. Die finansiële implikasies kan so geweldig wees dat een of beide van die partye na SA moet terugkeer om te oorleef. Jy kan self dink wat die gevolge op kinders kan wees. So kyk asseblief na jou huwelik en maak die band baie heg voordat jy immigreer!

TAAL EN KULTUUR

AFRIKAANS is nog springlewendig in New Zealand en hoewel ons 'n paar aanpassings vir plaaslike dinge, goeters en plekname moes maak is alles klopdisselboom.

Daar bestaan heelwat Afrikaanse organisasies, klubs, kerke, ens. wat 'n reuse bydrae maak tot die voortbestaan van Afrikaans en die kultuur van alle SAners in NZ EN wat die pyn van die vreemde en aanpsssing darem so 'n bietjie verlig.

Daar is omtrent in elke streek of groot dorp of stad in NZ 'n Afrikaanse klub, organisasie of kerk wat poog om die SAners bymekaar te bring. Die grootste Afrikaanse organisasie in NZ is die Afrikaanse Klub van Nieu-Seeland in Auckland. Weekliks stuur die klub ook 'n nuusbrief, genaamd "Brokkies" uit na ongeveer 1600 persone en die "Brokkies" word hier by ons afgewag met dieselfde opgewondenheid as die Huisgenoot! Skryf gerus in op die "Brokkies" (jy hoef nie in NZ te bly nie) deur die Afrikaanse klub te kontak by Die.Afrikaanse.Klub@clear.net.nz . As jy in NZ bly en jy ontvang nie die "Brokkies" en die nuusbrief "Uit-maar-Tuis" nie, dan is jy in die duisternis oor wat die SAners aanvang! Ander klubs vir SAners se aktiwiteite kan jy gaan opsoek op die volgende webwerwe:

www.sanztrust.org.nz (Goeie webwerf met BAIE inligting.) Gaan kyk ook op my SKAKELS blad vir baie meer skakels.

Verskeie Afrikaanse kerke bestaan ook en in die "Brokkies" sien jy weekliks verskeie Afrikaanse kerke hulle dienste en dienstye aankondig. Die grootste Afrikaanse kerk in NZ is die Afrikaanse Christenkerk van Nieu-Seeland met ongeveer 1200 lidmate in 4 Gemeentes (2 Gemeentes in Auckland, 'n gemeente in Hamilton (met 'n plaaswyk) en die nuutste gemeente in Rotorua). Die Afrikaanse kerke speel ook 'n groot rol in NZ om SAners saam te bind en vir hulle 'n geestelike en kulturele tuiste te bied.

Webblaaie waar jy meer kan lees oor die Afrikaanse kerke in NZ is:

www.afrchristenkerk.co.nz (Afrikaanse Christen Kerk van Nieu-Seeland)

http://www.ackhamilton.co.nz/ (Hamilton Gemeente van die ACK van NS)

http://www.ackwellington.co.nz/ (Wellington Gemeente van die ACK van NS)

www.ackchristchurch.co.nz (Christchurch Gemeente van die ACK van NS)

Immigrante wie inskakel by die kerke en Afrikaanse organisasies vind ook dat hulle landing hier in die vreemde soveel sagter is en dat die verlange darem so 'n bietjie minder is, want hulle het dadelik 'n ondersteuningsnetwerk en ook soveel meer geleenthede om geholpe te raak.

Baie SAners se verskoning hoekom hulle nie by die kerke en organisasies betrokke is nie is dat ons Afrikaners maklik "klieks" vorm wat mense vervreem. Dit is so, jy kry dit in SA en jy kry dit ook hier, jy sal nooit wegkom daarvan nie, maar Klieks is by verre in die minderheid en die oorgrote meerderheid van mense is maar net doodgewone SAners wat wil help en lekker saam kuier!

INTERESSANTE REALITEITE VAN IMMIGRASIE

Dit is BAIE keer die vrou se kwalifikasies wat SAners toegang tot NZ gee (verpleegsters, onderwyseresse, dokters, ens) en dit is so algemeen dat die manne dan die huishouding oorneem dat dit maar net aanvaar word as nog 'n feit van immigrasie. Soms vat dit maande voordat die man werk kan kry of heropleiding gekry het om 'n nuwe werk/beroep in NZ te begin. In meeste gevalle vind die omruiling van rolle redelik pynloos plaas en spring die manne gou in om die tradisionele "huisvrou" rol te vervul, want die realiteite dikteer. In 'n minderheid van gevalle is die omruil van die rolle BAIE pynlik en sal ek nou maar nie daarop ingaan nie.

Dit is werklik nie snaaks om die manne te sien inkopies doen, kinders skooltoe te vat, koskook, skoonmaak en was nie. Soms ruil ons selfs resepte uit!!

ALMAL moet hier uitspring en help, want daar is nie 'n huishulp of tuinwerker nie en dit verg soms fyn beplanning en 'n hele her-organisasie van die gesin en bedrywighede. Werk word gewoonlik versprei deur 'n rooster in die huis wat bepaal wie wat sal doen en wanneer. Gelukkig het 99% van huise 'n skottelgoedwasser en is skottelgoed was NIE die grootste probleem nie. Tuinwerk, grassny, was, stryk en stofsuig is die grootste probleme in ons huis ,want daar is ALTYD een wat kla oor die werk wat hy/sy gekry het!! Selfs na 10 jaar stoei ons nog soms, maar aan die einde kom alles darem gedaan as elkeen sy deeltjie doen. Soos ek altyd vir my kinders sê: "Jy hoef nie daarvan te hou om dit te kan doen nie - doen dit net!"

SA PRODUKTE IN NZ - OOK BOEREWORS, BILTONG & DRöEWORS!!

In die meeste groter plekke hou die groter supermarkte nou die BASIESE SA produkte aan soos mieliepap, mayonaise, Pro Nuto, vyekonfyt, Aromat ,ens. en is dit nie 'n probleem om dit in die hande te kry nie. Boerewors kry jy in omtrent elke groot supermark - dit smaak nie aldag soos ons boerewors nie, maar darem......! In plekke soos Auckland en Hamilton is slaghuise (van ex-SAners) wat vir jou REGTE boerewors, biltong en dröewors met die koerier sal stuur waarookal jy mag wees.

By die GEELBLADSYE van die Afrikaanse Klub sal jy ook by "KOS" 'n swetterjoel plekke kry waarvandaan jy SA produkte en wyn kan bestel of gaan koop. Hier is ook 'n paar besighede wat SA produkte aanhou:

MAAK 'N GOED INGELIGTE BESLUIT

Die rooi mat van immigrasie na NZ eindig by die lughawe as jy daar afklim en daarvandaan is jy op jouself aangewese. Immigrante kan ook nie reken op die steun van hulle werkgewers nie, so sorg dat jy so vêr moontlik op jou eie stoom kan reg kom.

As jy kom moet jy kom om permanent te bly en dit nie net sien as 'n proeflopie om te kyk of jy dit gaan maak nie. Doen jou Huiswerk goed! Kom hou vakansie hier en kry vir jou werk of ten minste ‘n werksaanbod - daarsonder hoef jy nie eens aansoek te doen nie.

Die meeste van ons kan net EEN keer bekostig om te immigreer en as jy ‘n fout gemaak het sit jy hier op hierdie twee eilandjies en gaan jy vir minstens vyf jaar "suffer" voordat jy kan verskuif. Kom met ‘n oop gemoed en moenie vooropgestelde idees hê van hoe dit gaan wees nie. Geniet die ervaring en geniet die lewe van dag tot dag.

NZ is ‘n fantastiese plek, maar as jy ‘n mens is met baie ambisies en groot drome kan jy baie beter doen op ander plekke en is NZ beslis nie vir jou nie! Die NZ komediant, Benjamin Crellin, het dit knap raak gevat toe hy gesê het: "Everyone in New Zealand wants to move up, but there is nowhere to move up to!!"

Ek wil graag hierdie webwerf gebruik om Suid-Afrikaners wat immigrasie na NZ oorweeg 'n oorsig te gee van die werklikheid en heersende toestande in NZ. Te veel mense wat hier voet aan wal sit kom na die "vakansiebrosjure" New Zealand toe en is na 'n paar maande baie teleurgesteld en sielsongelukkig.

Ons is baie gelukkig hier, NZ Burgers, goed gevestig en sal nie weer na SA terugkeer nie.
Win ASSEBLIEF so veel inligting as moontlik in voordat jy die groot besluit neem om te immigreer, want dit is die enigste manier waaarop jy die regte besluit gaan neem. Immigrasie issie vir sissies nie, maar verkeerde besluite het al helde laat val!!
 

Die Leuse van NZ immigrasie is : "New Zealand the right choice", maar as jy nie voorbereid was nie gaan jy baie lank oor jou "wrong choice" huil.

WAT IS DIE KIWI's SE SIENING VAN SUID-AFRIKANERS?

Daar is deesdae baie min Kiwi's wie nie dink SAners is arrogant en aggressief nie. Dit voel ook vir my asof die houding van SAners die afgelope 2 jaar of so ernstig agteruit begin gaan het, want voorheen het jy so hier en daar gehoor van 'n SAner wie sy naam gat gemaak het, maar deesdae kom dit vry algemeen voor en soms voel jy om in die grond weg te sak as jy hoor hoe sommige SAners hulle gedra.

Dit is erg ontstellend om te verneem dat ons gashere ons in sulke negatiewe terme sien. Ek weet nie waar dinge verkeerd geloop het nie, maar dit lyk vir my asof 'n mens deesdae min goed in SA regkry as jy nie konfronterend en aggresief is met 'n woordeskat wat daarby pas nie en daardie houding bring SOMMIGE immigrante met hulle saam as hulle immigreer.

In NZ help dit niks om luidkeels aan die vloek en skel te gaan en 'n "tantrum" te gooi as jy nie jou sin kry nie en dinge gebeur nie vinniger omdat jy aggressief is nie! Al wat jy regkry is om dinge vir die ander immigrante BAIE moeiliker te maak en SAners in die algemeen 'n swak naam te gee.

In sommige gevalle wil dit lyk asof geld party SAners laat dink dat die hele wêreld voor hulle moet neerbuig! In die meeste gevalle van onmanierlike optrede lyk dit my is dit pleinweg net 'n gebrek aan opvoeding en goeie maniere.

SAners begin deesdae hier werk en wil sommer dadelik die baas wees of soos een kiwi dit die anderdag stel - "The Wise-ass or Clever Dick at work is usually a South-African!". Dis vreeslik om dit te moet hoor en dryf my tot drank.

'n Kiwi-vriend van my wie by 'n bekende personeelagentskap werk wat vir baie SAners werk vind in NZ het 'n week of wat gelede vir my gesê dat sommige SAners (veral sommige AFRIKANERS) voorheen ietwat van 'n "attitude" probleem gehad het, maar dat dit nou vereger het en dat SAners nou meer van 'n "ALTITUDE" probleem het as 'n "ATTITUDE" probleem. Die "ALTITUDE" probleem het ek die afgelope jaar of wat gereeld en deeglik aan my bas ervaar en dit lyk of sommige SAners dink die rooi tapyte moet uitgerol word en Engelekore moet begin sing sodra hulle hier aan wal stap! Dis soms so pateties om te sien hoe hoog hulle hul self ag dat jy kan naar word daarvan.

NB: Ter verdediging van ons mense moet ek ook sê dat dit wat die Kiwi's BAIE keer by SAners sien as Arrogansie en Aggressie is eintlik meer AMBISIE en KOMPETISIE ,want ons kom uit 'n Wêreld waar jy net eenvoudig die BESTE moet wees en die beste moet lewer om te oorleef en dit bestaan nie in die Kiwi's se wêreld nie.

 UITERS NEGATIEWE GESINDHEID

Ek het die afgelope tyd op baie forums van SA koerante en tydskrifte verskriklike negatiewe konflikte gesien tussen SA ex-pats en mense wie nog steeds in SA bly, daarby maak ons dit ook ons werk om die mense tuis in SA te demoraliseer. HOEKOM? In my boek is die ouens wie in SA agtergebly het die ware helde, want hulle moet elke dag al die negatiewe dinge trotseer om 'n lewe te kan voer en dan nog OOK met die str...t opgeskeep sit wat die ex-pats hulle wil voer.

NOU WAT DOEN ONS?

Ons versamel al wat negatiewe berig is oor SA en druk dit in die kele af van ons familie en vriende wie in SA agtergebly het. Dit is ook heel maklik, want ons het teen belaglike lae koste vrye en onbeperkte toegang tot die Internet en ons lees elke moontlike koerant en stukkie inligting oor SA. Ons weet baie keer van nuus waarvan baie mense in SA nie eens weet nie en omdat ons 10-11 ure in tyd voor SA is lees ons baie kere nuus op die Internet nog voordat die eerste oggendkoerante in SA uit is. Moenie ‘n fout maak nie, SA immigrante in NZ is TEN VOLLE op hoogte met wat in SA aangaan. Dit is verseker! Op enige dag sal vele negatiewe berigte oor SA sommer vanself per e-mail deur die elektroniese “grapevine” op jou rekenaar beland – jy hoef nie eens daarvoor te gaan soek nie.

Ons versamel gewoonlik hierdie sappige stukkies negatiewe nuus oor SA in een groot lêer en laat dit los op ons familie en vriende in SA soos ‘n reuse elektroniese trosbom en..................... voel dan baie trots op onsself! Ons wend ons selfs deesdae ook skaamteloos tot Internetforums en het dan niks anders om te doen as om gif te strooi oor SA nie, pleks ons help eerder en praat die mense moed in!

Wat ookal ons verskeie motiewe is om dit te doen en wat ons ookal MAG dink ons daardeur bereik, bereik ons meestal net die volgende:

Verlaag die GATVOL-indeks van SAners vir ex-pats.
Verhoog die angstigheidsvlakke van ons vriende en familie in SA.
Bevestig die vermoede by hulle dat ons windgat en verwaand is en net “cheap” wil brag oor ons nou uit die vuur is.
Bou ‘n intense wrewel teen expats op in die mense wat in SA “agtergebly” het en daagliks die geveg moet veg teen die verskriklike goed waarmee ons hulle bombardeer.

Dis net geen wonder dat sekere familie en vriende nie meer vir ons wil skryf of bel nie, want al wat ons geword het is “doomsday prophets”!. As ons maar soveel geld vir ons mense stuur soos stront e-mails of forum-diarree sal ons dalk baie meer aan hulle situasie kan doen en ek dink tot tyd en wyl ons beter kan doen moet ons maar eerder ons bekke hou!
 

Dis net so goed ons bel die jode in ‘n konsentrasiekamp in Duitsland en vertel hulle hoe benard hulle situasie is! DINK ONS HULLE WÉÉT DIT NIE??!!

BOEREWORSRESEP vir BOEREWORS "PATTIES"

Nou sal julle ook seker wonder wat 'n boereworsresep hier soek, maar dis nou uitsluitlik vir gevestigde immigrante wat op klein plekkies bly waar hulle nie so maklik boerewors kan koop soos ons nie en ook nie 'n vleismeul en worsderms het nie. Aan die begin van ons immigrasie was boerewors so skaars soos hoendertande en kon jy net lekker boerewors gekry het as jy die slag Auckland toe gegaan het. Ek en my neef Henry Enslin het toe met verskeie boerewors resepte begin eksprimenteer (sien die storie "Chilliwors").

Ons het 'n lekker en eenvoudige resep saamgeslaan uit die dosyne resepte wat ons gekry het en hierdie resep het net speserye in wat jy sommer by jou plaaslike supermark (of Chinese winkel) kan koop. Die wors sal seker nie pryse wen nie, maar dit gaan heeeeeel goed af!!

Oor worsmaak so 'n vreeslike besigheid is maak ons deesdae net "patties" van die vleis of sit die worsvleis in 'n skilferkorsdeeg vir vingerlek lekker vleispasteitjies.

Die resep is vir 2 Kilogram maalvleis. Die lekkerste "patties" kry jy van 'n mengsel van bees-en vark maalvleis. As jy 1 Kilo bees en 1 Kilo vark meng kry 'n ongelooflike lekker pattie wat nie heeltemal so droog is nie. Die enigste probleem as jy net "Prime Beef mince" gebruik is dat die pattie effens droog is, daarom is daar 200ml sonneblomolie in die resep. Eksperimenteer maar self met die bestanddele.

RESEP:

• 2 Kg beesmaalvleis of 1 Kg bees en 1 Kg vark.

• 10 gram Aromat of MSG (Monosodium Glutamate) - (Kan uitgelos word as jy nie het nie).

• 12 gram gemaalde koljander (probeer om die koljander self te maal - ek gebruik sommer die elektriese koffiemeultjie en spoel hom dan vinnig uit as ek klaar is - maak my vrou baie moedeloos!).

• ¾ - Driekwart gelykvol teelepel fyn naeltjies ("Cloves").

• ¾ - Driekwart gelykvol teelepel fyn neutmuskaat ("Nutmeg").

• 1½ - Een-en 'n half teelepel fyn swart peper.

• 30 gram sout.

• 200 ml moutasyn ("Malt vinegar").

• 200 ml sonneblomolie (as die vleis min vet het).

Meng alles saam, laat staan so 30 minute en maak lekker "patties" of vleispasteitjies.

Geniet dit!!

PS: Omtrent al die SA slaghuise in Auckland sal vir jou boerewors met 'n oornag koerier stuur as jy dit bestel.

Ons vriendelike SA slaghuis in Hamilton (www.elitemeats.co.nz) sal vir jou die lekkerste biltong, droëwors, chillibites, boerewors, ens. oornag koerier na enige plek in NZ. Bel hulle net, jy sal nie vriendeliker mense in NZ kry as die span by Elitemeats nie!!

^^ TERUG NA BO