Hoe begin 'n mens die immigrasieproses na New Zealand?

In 'n neutedop en baie vereenvoudig lyk die immigrasieproses so:

1. Kyk of jy kwalifiseer vir immigrasie na NZ (besonderhede hieronder).

2. Voltooi die "Points Indicator" en kyk of jy 150 punte het.

3. As jy nie 150 punte het nie, moet jy eers vir jou 'n werk kry en as jy dan 150 punte het kan jy aansoek doen.

4. Voltooi jou "Expression of Interest" en wag tot die trekkings gedoen word.

5. As jy genoeg punte het (gewoonlik 135 en bo) sal jy deur NZ Immigrasie "uitgenooi" word om aansoek te doen vir PR (Permanent Residency).

6. Doen aansoek vir PR.

Om PERMANENT na New Zealand te immigreer moet jy 'n kwalifikasie of vaardigheid hê waaraan daar 'n tekort in New Zealand is en dit word die "Skilled Migrant Category" genoem. 99% van immigrante na NZ kom onder die "Skilled Migrant Category" na NZ.

Daar is ook 'n paar ander kategorië waaronder jy na NZ kan immigreer en al die kategorië is:

1. Skilled Migrant

2. Investor

3. Family reunification

4. Work to residence

5. Long term business visa

7. Refugee

Oor al die kategorië kan jy in detail gaan oplees op die webwerf van NZ Immigrasie en ek gaan nie daarop uitbrei nie. Omtrent 99% van SAners kwalifiseer onder die "Skilled Migrant" kategorie en daarom gaan ek net die "Skilled Migrant" kategorie bespreek.

Om te weet of jy 'n kwalifikasie of vaardigheid het wat jou gaan toelaat om onder die NZ Immigrasiebeleid se "Skilled Migrant Category" permanent na new Zealand te immigreer MOET jy aan een van die volgende drie dinge voldoen nl:

1. Jou beroep en kwalifikasies moet in die "Long Term Skills Shortage List" van NZ Immigrasie voorkom

OF....

2. Jou beroep en kwalifikasies moet in die "Immediate Skills Shortage List" van NZ Immigrasie voorkom

OF...

3. Jy moet 'n werk in NZ doen wat op die "Skilled Occupations List" voorkom.

Jy kan die "Long Term Skills Shortage List" , die "Immediate Skills Shortage List" en "Skilled Occupations List"  kry deur na die webwerf van die NZ IMMIGRASIEDEPT. te gaan. Gebruik die "search" funksie om by die lyste uit te kom. Die "Skilled Occupations List" kan jy kry deur in die "search" funksie die woorde "operations manual" in te tik en as jy by die "operations manual" uitkom gaan na die afdeling wat sê "appendices". Laai "appendices" af (PDF-dokument) en onder by hoofstuk 11 sal jy die "Skilled Occupations List" kry.

Ek hou nie die drie bogemelde lyste op my webwerf nie omdat hulle gereeld verander en ek nie die tyd het om hulle aanmekaar te verander nie. Dis egter baie maklik om die lyste op NZ Immigrasie se webwerf te kry.

DIE VOLGENDE STAP?

As jy nou vasgestel het dat jou beroep en kwalifikasies in een van die twee "skills shortage lists" voorkom of jy het 'n werk wat in die "Skilled Occupations List" voorkom dan moet jy ook nog aan 'n hele paar ander vereistes onder die NZ Immigrasiebeleid voldoen. Onder andere moet jy 'n skoon Polisierekord hê.

New Zealand gebruik 'n puntestelsel om te bepaal of jy kwalifiseer vir Permanete Verblyf (PR) onder die "Skilled Migrant" kategorie. Op die oomblik het jy 100 punte nodig om aansoek te doen en 150 punte om outomaties gekies te word. Sommige persone kry 150 punte sonder dat hulle 'n "Job Offer" hoef te hê, terwyl ander eers 'n "Job Offer" moet kry voordat hulle kwalifiseer. Om te sien hoeveel punte jy het moet jy 'n vorm op NZ Immigrasie se webwerf gaan invul. Die vorm word die "Points indicator" genoem en om daarby uit te kom gaan jy na NZ Immigrasie se webwerf (kliek op die skakel) en by die "search" funksie tik jy "Pionts Indicator" in en kliek op "Go". Die nuutste "Points Indicator" sal verskyn. Vul die vorm in.

As die "points indicator" aandui dat jy 150 punte of meer het moet jy nou na die volgende stap oorgaan en dit is om die Expression Of Interest (EOI) in te vul. Die koste verbonde aan die EOI is NZ $400. As jou punte tussen 100 en 130 is sal ek sê jy moet nie eens die moeite doen om aansoek te doen voordat jy nie 'n werk gekry het nie. As jy 150 of meer punte het kan jy dadelik die vorm invul en jy sal verseker gekies word.

As jy eers 'n "Job Offer" moet hê voordat jy kan kwalifiseer (150 punte) moet jy nou die wiele aan die rol sit om vir jou werk te kry in NZ en dan eers hierheen kom op 'n Werksvisa of hierheen kom op 'n besoekersvisa en vir jou 'n werk kom kry en dan aansoek doen.

1. Die HEEL EERSTE ding (almal wat vir my skryf ignoreer hierdie gedeelte heeltemal! Hoekom?)  wat jy moet doen is om jou kwalifikasies te laat evalueer deur die New Zealand Qualifications Authority (NZQA). Jy sal al die inligting wat jy nodig het op hulle website kry by: http://www.nzqa.govt.nz/ . Op die oomblik kos dit NZ $486 per evaluasie. Sover ek weet word die evaluasie van kwalifikasies van die mediese professies (verpleegsters, dokters, fisios, ens.) nie deur NZQA gedoen nie, maar deur die Professionele Rade waar hulle moet registreer. Maak asseblief net seker daarvan. Besoek hulle webwerwe by: http://www.mcnz.org.nz (Medical Council of NZ) ; http://www.nursingcouncil.org.nz (Nursing Council of NZ).

Onderwysers moet ook eers hulle kwalifikasies laat evalueer deur die NZQA en dan MOET hulle registreer by die NZ Onderwysersraad.

1. Die volgende stap is om aanlyn vanaf NZ Immigrasie se webwerf die "Expression of Interest" vorm te voltooi. Jy moet registreer en 'n fooi (NZ $400) betaal om die vorm te voltooi. Gaan na die webwerf van NZ Immigrasie en by die "Search" funksie tik jy in "Expression of Interest" en kliek "go". Jy sal dan by die nuutste "Expression of Interest" blad uitkom. Voltooi die vorm. Die rede hoekom ek die "search" funksie op die Immigrasie webwerf gebruik en nie 'n direkte skakel na die verskillende vorms en blaaie het nie, is omdat die blaaie so baie verander dat 'n mens sommer gou gou met 'n klomp dooie skakels sit wat niks beteken nie. As jy die "search" funksie op die webwerf gebruik kry jy altyd die nuutste blad.

WAARSKUWING: MOENIE jou kwalifikasies of werkservaring in jou "Expression of Interest" op pomp om meer punte te kry nie, want as jy nie jou kwalifikasies en werkervaring swart op wit kan bewys nie kan jou PR-aansoek summier afgekeur word.

2. Met die "Expression of interest" laat jy die NZ Immigrasiedepartement weet dat jy belang stel om te immigreer en ook dat jy wel kwalifiseer om te immigreer. Jou aansoek beland dan in 'n poel waaruit suksesvolle aansoekers getrek word. As jy suksesvol is in jou "Expression of interest" sal hulle (NZ Immigrasie) jou in kennis stel dat jy suksesvol was en sal hulle jou dan uitnooi om aansoek te doen vir Permanente Verblyfreg (PR) in New Zealand. Na die uitnodiging het jy net 'n beperkte tyd waarin jy jou aansoek kan indien en daarom moet jy reeds jou dokumentasie reg kry voordat jy jou "Expression of Interest" insit.

3. "Expression of Interest" aansoeke bly vir 6 maande in die poel.

4. Daarna moet jy dan maar net die proses volg totdat jy jou PR kry. Dit KAN lank vat (ek sê nie die GAAN lank vat nie) en berei jou maar daarop voor dat daar 'n paar angsvolle maande kan verloop voordat jy uiteindelik jou PR kry, MAAR dit is alles op die einde die moeite werd vir 'n nuwe toekoms in 'n fantastiese land.

NOTA: Die oorgrote meerderheid van SAners wie Permanente Verblyfreg (PR) in NZ kry kom eers na NZ op 'n werkspermit of kry eers hier werk en 'n werkspermit en doen dan aansoek vir PR in die proses soos ek dit uiteengesit het. By verreweg die beste is egter om reeds voor jou vertrek na NZ PR te hê, maar dit is beslis nie altyd moontlik (of maklik) nie, veral nie as jy eers 'n "Job Offer" moet kry om te kwalifiseer nie.

1. Jy KAN eers na NZ kom op 'n werkspermit of besoekersvisa en dan die proses van Permanente Verblyfreg in NZ begin (soos bo) en jy hoef dit nie noodwendig uit SA te doen voor jy kom nie, MAAR maak net eers seker jy sal wel kwalifiseer VOORDAT jy kom.

2. Ek word BAIE gevra of 'n mens nie permanent in NZ op 'n werkspermit kan bly nie sonder om aansoek om Permanente Verblyfreg (PR) te doen nie en dit is ook so dat, al kwalifiseer jy nie vir PR nie, jy wel hier kan werk en 'n werkspermit kry en selfs vir 'n hele paar jaar op 'n werkspermit hier kan bly, MAAR werkspermit hernuwings is NIE gewaarborg nie en op die ou end gaan hulle jou verplig om aansoek te doen vir PR en as jy NIE kwalifiseer nie gaan dit die einde van die paadjie vir jou in NZ wees. Dit is verskriklik hartseer, maar dit gebeur daagliks dat mense wie hier is op werkspermitte en selfs jare op werkspermitte hier was moet teruggaan SA toe omdat hulle nie kwalifiseer vir PR nie. As jy nie voor jou koms na NZ gekwalifiseer het vir PR nie gaan jy NIE hier kwalifiseer net omdat jy hier gebly het nie!

3. Ek wil amper sê ek smeek SAners om dit NIE te doen nie, want om gedeporteer te word of verplig te word om na SA toe terug te keer na 'n paar jaar in NZ moet verskriklik wees, want waarna toe gaan jy terug? NIKS.

4. Ek het ongelooflik baie simpatie met SAners wat wil weg kom uit die omstandighede in SA en my hart gaan na hulle uit, maar om onverskillig immigrasie aan te pak en net op te pak en te kom, sonder om seker te maak jy kan permanent bly is om jou bloot te stel aan ongelooflike hartseer en swaarkry. MOET DIT NIE DOEN NIE. ASSEBLIEF.

5. New Zealand is 'n gesogte Immigrasiebestemming en SAners ding met duisende ander immigrante regoor die wêreld mee om permanent hier te kan bly.

6. Ek sal ten sterkste aanbeveel jy gaan lees ook die volgende webblad sorgvuldig deur:

How do I get a job in New Zealand if I’m not a resident?

Die enigste Immigrasiekonsultante wat ons met vrymoedigheid kan aanbeveel is PROTEA PACIFIC - hulle is beslis nie die goedkoopste nie, maar jy kan op 'n diens van hoë gehalte reken.

(LW - Ek is op geen manier verbind aan Protea Pacific nie en kry ook geen betaling of gunste van enige aard om hulle te adverteer nie, ek beveel hulle aan suiwer net op die positiewe terugvoer wat ek oor 'n lang tyd van immigrante ontvang het oor hulle goeie diens.)